Kaffee bloasa, Zeidong lesa,
was gibt’s Neus, was isch denn gwesa.
So muaß s’Frühstück äll Dag afanga,
sonschd kennschd ned zom Schaffa ganga.

Am schönschda isch’s, was mr scho kennd
ond sich dr Schreiberling verrennt,
zomma Thema, selbschd bisch Meischder,
was schreibed die für Scheibakleischder.

Des macht Spaß, a bissle schempfa.
Mr kennd’se mit’ma Leserbriaf empfa.
Solle me ärgera oder esse no en Wecka?
Solle gähna oder duan’e me strecka?

Sodde Endscheidunga am früha Morga.
S’Hirn schloaft no faschd, han andere Sorga.
Jetzt hanne Kaffee auf d’Zeidong glebberd,
mei Frau wird schempfa dass’es schebberd.

Dr’bei isch d’Zeidong heut bädschnass
s’hot gregned, s’Wedder macht koin Spass.
Ond was stoaht do zom Wedder drenn?
Grad s’Gegadail, i glaub i spenn.

Em Sportdeil send’se Patriota
obwohl die kickt’hen wie Idiota
do sieht mr halt, wenn onsere kicket
isch Objektivität verzwicket.

d’Wirtschaft könnt so spannend sei,
doch fällt dem Redakteur nix ei.
Abschreiba was d’Agentur scho tickert
ond geschtern scho’mol ghört vom Wickert.

Also Neus stoaht heut nix drenna,
gibt’s sonschd no ebbes z’gwenna?
Sonscht gucke halt en’s Internet,
s’isch fixer als a Offline-Set.

So könnt’e grad auf’s Blatt verzichta,
schnell en Blick en’s Web däd’s richta.
Aber i kennt net zom Frühstück,
schempfa mit’ma Blick zurück.