Mei Garda,
der koa no warda.
Worom? Draußa duad’s schneia,
i hock am Fenschder, koa me dro freia.

Bald gucket Premela zur Wiesa raus
ond Schlüsselbloma wachsed zom Strauß.
d’Veigala leuchdet lila sadd.
Jedes Joahr ben’e auf’s neue pladd.

Was dr liab Godd so spriaßa läßt,
manchmol isch’s z’viel, i werd au gstreßt.
S’braucht scho sei Zeit zom Hecka schera,
d'Wiesa mäha, s’Teichle klära.

Als Gärtner bisch doch mächtig stolz.
Bäum en Form schneida, des gibt Holz.
Sieht guad aus ond schpard au Geld.
Beim Nochbor oagseah, für d’Frau a Held.

Auf d’Schnecka hann’e älls mächtig Zorn.
Aber a Weile scho nemm’e koi Schneckakorn.
I pflanz bloß no des, was’se ned meged,
Schmeiß’se zom Nochbor, dass die sich aufreged.

Ernda wird zom größschta Tescht,
drondernai a Gardafescht,
mit Freind, Verwandte, Enkelkender.
No richtet mr'n für’n nägschda Wender.